ព័ត៌មានជាតិ

សម្ភារៈសង្គ្រោះគ្រោះមហន្តរាយ នៅបញ្ជាការដ្ឋានវិស្វកម្ម ដើម្បីត្រៀមក្នុងការឆ្លើយតបគ្រោះមហន្តរាយ


(ព្រឹកថ្ងៃទី២២ ខែមិថុនា ឆ្នាំ២០២១)៖ ឯកឧត្តម ឧត្តមសេនីយ៍ឯក ច័ន្ទ លំផាត់ អនុប្រធាន គណៈកម្មាធិការជាតិគ្រប់គ្រងគ្រោះមហន្តរាយ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំក្រុមការងាររួមមាន ឯកឧត្តម ឈៀ ស៊ីដារ៉ា ឯកឧត្តម គីម វីរៈ ឯកឧត្តម គឹម សំអាន ឯកឧត្តម ឡៅ សុខហួរ (តំណាងលេខាធិការដ្ឋានគ្រោះមហន្តរាយក្រសួងការពារជាតិ) និងឯកឧត្តម អស់លោក មន្ត្រីពាក់ព័ន្ធមួយចំនួន អញ្ជើញចុះសួរសុខទុក្ខ និងត្រួតពិនិត្យសម្ភារៈសង្គ្រោះគ្រោះមហន្តរាយ នៅបញ្ជាការដ្ឋានវិស្វកម្ម ដើម្បីត្រៀមក្នុងការឆ្លើយតបគ្រោះមហន្តរាយ។

ឯកឧត្តម មេបញ្ជាការរងនៃបញ្ជាការដ្ឋានវិស្វកម្ម តំណាង ឯកឧត្តម មេបញ្ជាការ បានមានប្រសាសន៍ថា កងកម្លាំងវិស្វកម្ម តែងបានចូលរួមចំណែកយ៉ាងសកម្មក្នុងបេសកកម្មឆ្លើយតបសង្គ្រោះគ្រោះមហន្តរាយផ្សេងៗ ពិសេស ការរលំបាក់អគារ ទឹកជំនន់... ហើយបច្ចុប្បន្នកងកម្លាំងមួយចំនួនធំ កំពុងចុះបំពេញបេសកកម្មនៅតាមបណ្តាខណ្ឌនានាក្នុងរាជធានីភ្នំពេញ លើការងារពាក់ព័ន្ធកូវីដ-១៩។

ឯកឧត្តម បានបញ្ជាក់ថា ទូក និងសម្ភារៈសង្គ្រោះផ្សេងៗ ដែល ឯកឧត្តម នាយឧត្តមសេនីយ៍ ទេសរដ្ឋមន្ត្រី បានផ្តល់ជូនកន្លងមក គឺត្រូវបានរក្សាទុកនិងថែទាំយ៉ាងល្អសម្រាប់ប្រើប្រាស់ក្នុងការជួយសង្គ្រោះប្រជាជន។ ចំពោះកងកម្លាំង ក៏ត្រូវបានបញ្ជូនឱ្យធ្វើការហ្វឹកហ្វឺនជាមួយកងពលផ្សេងៗ ដូចជា បញ្ជាការដ្ឋានទ័ពពិសេស, ង៧០... នឹងតែងធ្វើការប្រជុំតាមប្រព័ន្ធវីដេអូជាមួយកងកម្លាំងសង្គ្រោះ ទៀងទាត់រៀងរាល់សប្តាហ៍ ដើម្បីដាស់តឿន និងពង្រឹងសមត្ថភាពកងកម្លាំង។

ឯកឧត្តម បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម នាយឧត្តមសេនីយ៍ ទេសរដ្ឋមន្ត្រី ដែលតែងយកចិត្តទុកដាក់ អំពីសុខទុក្ខរបស់បងប្អូនកងកម្លាំងនៃបញ្ជាការដ្ឋានវិស្វកម្ម និងផ្តល់ជូនជាសម្ភារៈសង្គ្រោះផ្សេងៗ។

ឯកឧត្តម ច័ន្ទ លំផាត់ បានពាំនាំការសួរសុខទុក្ខ និងក្តីនឹករលឹកពីសំណាក់ ឯកឧត្តម នាយឧត្តមសេនីយ៍ ទេសរដ្ឋមន្ត្រី ជូនចំពោះ ថ្នាក់ដឹកនាំ និងកងកម្លាំងទាំងអស់ និងបានកោតសរសើរចំពោះកងកម្លាំង ដែលបានចូលរួមយ៉ាងសកម្មក្នុងការចល័តកម្លាំង ជួយក្នុងបេសកកម្មឆ្លើយតបសង្គ្រោះប្រជាជនរងគ្រោះដោយគ្រោះមហន្តរាយផ្សេងៗ និងបញ្ហាកូវីដ-១៩ នាពេលបច្ចុប្បន្ននេះ។

ឯកឧត្តម ឆ្លៀតក្នុងឱកាសនោះ បានរំលឹកដល់ការប្រឹងប្រែងរបស់កងកម្លាំងវិស្វកម្ម ក្នុងការជួយដឹកជញ្ជូន លើកដាក់ទឹកសុទ្ធ និងស្បៀងដើម្បីចែកជូនប្រជាជនរងគ្រោះដោយទឹកជំនន់ កាលពីឆ្នាំ២០២០។

ឯកឧត្តម បានលើកទឹកចិត្តឱ្យកងកម្លាំងទាំងអស់ហ្វឹកហាត់ដុសខាត់ជំនាញឱ្យបានជាប្រចាំ ដើម្បីត្រៀមឆ្លើយតបទឹកជំនន់ ដែលអាចកើតឡើងក្នុងឆ្នាំ២០២១នេះ និងការសង្គ្រោះលើមុខសញ្ញាផ្សេងៗទៀតជាយថាហេតុ។

ក្នុងពិធីនោះដែរ ឯកឧត្តម គីម វីរៈ ទីប្រឹក្សា គ.ជ.គ.ម. បានបញ្ជាក់ជូនថា ឯកឧត្តម នាយឧត្តមសេនីយ៍ ទេសរដ្ឋមន្ត្រី នឹងពិនិត្យលើការផ្តល់ជូនជាតង់ និងសម្ភារៈផ្សេងៗ។ ឯកឧត្តម បានលើកទឹកចិត្ត ដល់កងកម្លាំងហ្វឹកហ្វឺនលើការប្រើប្រាស់សម្ភារៈដែលបានផ្តល់ជូន កន្លងមក នឹងត្រៀមខ្លួនជាប្រចាំ ព្រោះគ្រោះមហន្តរាយនឹងអាចកើតឡើងដោយ ពុំប្រាប់យើងមុនឡើយ។

 

 

ព័ត៌មានជាតិ

អត្ថបទទាក់ទង