ព័ត៌មានកីឡា

ការប្រកួតកាយសម្ព័ន្ធជើងឯកថ្នាក់ជាតិ និងពានរង្វាន់ ឯកឧត្តមបណ្ឌិត ថោង ខុន ជាការសម្រួចគុណផលឆ្ពោះទៅស៊ីហ្គេម២ លើកចំពោះមុខ


ការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី៥ ឆ្នាំ២០២១ បានបិទបញ្ចប់ដោយជោគជ័យ កាលពីល្ងាចថ្ងៃទី១៣ ខែធ្នូ ឆ្នាំ២០២១ នៅសាលាបឋមសិក្សាសាលាលេខ៥ ស្រុកកំពង់ត្រឡាច ខេត្តកំពង់ឆ្នាំង បន្ទាប់ពីដំណើរការប្រកួតដោយរលូនអស់រយៈពេល៦ថ្ងៃ ដោយព្រឹត្តិការណ៍ដ៏ធំប្រចាំឆ្នាំនេះ គឺជាការសម្រួចគុណផលកីឡាឆ្ពោះទៅចូលរួមប្រកួត ស៊ីហ្គេមគោលដៅ២លើកចំពោះមុខ។

 

លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា និងជាតំណាងដ៏ខ្ពង់ខ្ពស់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជាមានប្រសាសន៍ថា ការប្រកួតកីឡាកាយសម្ព័ន្ធថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន ឆ្នាំនេះ គឺជាគោលបំណងចម្បង ក្នុងការសម្រួចគុណផលកីឡាកាយសម្ព័ន្ធ ឆ្ពោះទៅចូលរួមប្រកួតប្រជែង ស៊ីហ្គេម លើកទី៣១ នាខែឧសភា ឆ្នាំ២០២២ នៅប្រទេសវៀតណាម និងត្រៀមឆ្ពោះទៅទទួលធ្វើម្ចាស់ផ្ទះ កីឡាស៊ីហ្គេម លើកទី៣២ ឆ្នាំ២០២៣ នៅព្រះរាជាណាចក្រកម្ពុជា។ អ្វីដែលពិសេស គឺផ្នែកកាយសម្ព័ន្ធអាអេរ៉ូប៊ិកត្រូវបានផ្តោតសំខាន់ខ្លាំង សម្រាប់ឆ្ពោះទៅប្រកួតស៊ីហ្គេម ឆ្នាំ២០២២ ឲ្យមានលទ្ធផលដ៏គាប់ប្រសើរ ដើម្បីវាស់ស្ទង់ សម្រាប់ស៊ីហ្គេម ឆ្នាំ២០២៣។ ដើម្បីត្រៀមស៊ីហ្គេមគោលដៅ២លើកចំពោះមុខនេះ ក្រុមជម្រើសជាតិកាយសម្ព័ន្ធនឹងត្រៀមចេញទៅហ្វឹកហាត់នៅប្រទេសចិនផងដែរ។

លោកបន្ថែមថា ព្រឹត្តិការណ៍ប្រកួតថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន ឆ្នាំនេះមានភាពល្អប្រសើរច្រើន លើផ្នែកវិញ្ញាសាកីឡាកាយសម្ព័ន្ធអាអេរ៉ូប៊ិកមិនថមថយគុណភាពបច្ចេកទេនោះទេ ខណៈប្រភេទវិញ្ញាសាកាយសម្ព័ន្ធអាទីស្ទីកមានមួយចំនួនមិនពេញលេញ ដោយសារការហ្វឹកហាត់ក្នុងបរិបទកូវិដ-១៩មិនបានពេញលេញល្អ និងខ្វះខាតសម្ភារជាដើម។

តំណាងឯកឧត្តមប្រធានសហព័ន្ធរូបនេះបន្ថែមទៀតថា បើទោះបីជាព្រឹត្តិការណ៍នេះត្រូវបានរៀបចំឡើងនៅក្លិបកីឡាសាលាលេខ៥ក៏ពិតមែន ប៉ុន្តែការវាយតម្លៃលើការរៀបចំ និងបច្ចេកទេសអាចទទួលយកបាន។ «តាមរយៈការប្រកួតដ៏ធំប្រចាំឆ្នាំនេះ គឺក្រុមជម្រើសជាតិនៅតែមានគុណផលល្អ ដោយសារឯកឧត្តមបណ្ឌិត ថោង ខុន ជំរុញឲ្យបន្តការហ្វឹកហាត់បិទខ្ទប់ ហើយខ្ញុំក្នុងនាមជាអ្នកអនុវត្តបច្ចេកទេស ខ្ញុំអនុវត្តតាមអនុសាសន៍របស់ឯកឧត្តមប្រធាន ដែលធ្វើឲ្យកីឡាករ កីឡាការិនីជម្រើសជាតិនៅតែមានភាពមុះមុតលើផ្នែកបច្ចេកទេសកម្រិតខ្ពស់ដដែល»។

ជាមួយគ្នានោះ ក្នុងនាមមហាគ្រួសារកីឡាកាយសម្ព័ន្ធកម្ពុជា លោក ណយ ផាណា បង្ហាញនូវក្តីរីករាយយ៉ាងខ្លាំង ដែលព្រឹត្តិការណ៍ឆ្នាំនេះត្រូវបានបញ្ចប់ដោយរលូន និងជោគជ័យ ក្នុងបរិបទថ្មី គន្លងថ្មី ដែលធ្វើឲ្យគ្រប់វិស័យ រួមទាំងវិស័យកីឡាអាចបន្តដំណើរអភិវឌ្ឍឡើងវិញ ក្រោមការខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ស្របពេលដែលផ្នែកជំនាញរបស់កីឡាកាយសម្ព័ន្ធកម្ពុជាក៏ទទួលបានការឧបត្ថម្ភគាំទ្រ សម្ភារហ្វឹកហាត់ពីបណ្តាប្រទេសជាមិត្ត ដូចជាជប៉ុន រុស្ស៊ី ចិន ដែលឯកឧត្តមបណ្ឌិត ថោង ខុន និងលោកឧកញ៉ា សុខ ហុង អនុប្រធានសហព័ន្ធ តែងតែប្រឹងប្រែងអភិវឌ្ឍន៍ប្រភេទកីឡាកាយសម្ព័ន្ធឲ្យកាន់តែរីកចម្រើនបន្ថែមទៀត ជាពិសេសគឺគោលដៅធំនៃដំណើរឆ្ពោះទៅធ្វើម្ចាស់ផ្ទះ ស៊ីហ្គេម ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជាតែម្តង។

សូមបញ្ជាក់ថា ឆ្លងកាត់ប្រកួតយ៉ាងស្វិតស្វាញលើគ្រប់វិញ្ញាសា គណៈកម្មការបច្ចេកទេសសម្រិតសម្រាំងបានលទ្ធផលបច្ចេកទេសលើកវិញ្ញាសាកាយសម្ព័ន្ធអាទីស្ទីក ៦វិញ្ញាសា និងកាយសម្ព័ន្ធអាអេរ៉ូប៊ិកសរុប៥វិញ្ញាសា គឺក្លិបកាយសម្ព័ន្ធក្រសួងមហាផ្ទៃឈរនៅចំណាត់ថ្នាក់លេខ១ ដោយដណ្តើមបានមេដាយមាស ៤, លេខ២ ខេត្តក្រចេះ មេដាយមាស ៣, ខេត្តកំពង់ឆ្នាំង មេដាយមាស ៣ និងខេត្តតាកែវ មេដាយមាស ១។ ក្រៅពីនេះក៏មានជ័យលាភីលេខ២ និងលេខ៣ អមលើវិញ្ញាសាសរុបទាំង១១នេះផងដែរ៕

 

ព័ត៌មានកីឡា

អត្ថបទទាក់ទង

អត្ថបទថ្មី